كتير مننا بيحصل معانا لما بنشتري جزمة جديدة
بتبقى ضيقة على الرجل او بتوجع رجلنا شوية في البداية مع المشي وبتسبب الم في
القدم والصوابع, والنهاردة هنعرف مع بعض حل المشكلة دي عن طريق 5 طرق لتوسيع الجزمة
لو ضيقة عليكي وبتوجعلك رجلك وكلها طرق بسيطة وسهلة جدا.
5 طرق لتوسيع الجزمة:
1- فرك الجزمة بالكحول:
فرك الجزمة بالكحول من الحيل الفعالة جدا اللي
بتساعد على توسيعها, وممكن نستخدمه بطريقتين.
1- اقطعي
قطعة قطن كبيرة وحطي عليها كحول كفاية لحد ما تبقى رطبة خالص ومتشبعة كويس بالكحول
وحطيها جوه الجزمة في المكان الضيق واضغطي عليها لحد ما تلاقي الكحول نزل في
الجزمة وفورا في ساعتها البسي الجزمة واتمشي بيها ولازم الخطوة دي تتعمل بسرعة لان
الكحول بينشف وبيطير بسرعة جدا, لان كل ما تكون رطبة هتجيب معاكي نتيجة احسن وهتوسع
الجزمة بشكل احسن.
2- لو
الجزمة ضيقة اوي هاتي شراب تخين وانقعيه في الكحول والبسي الشراب وبعدين البسي
عليه الجزمة واتمشي بيها لحد ما الكحول يتبخر خالص والشراب ينشف.
الطريقة دي فعالة جدا لتوسيع الجزمة كلها او
اجزاء بس منها, وهي افضل للجزم اللي مصنوعة من المواد الطبيعية والاقمشة, واتجنبي
الاستخدام المتكرر للطريقة دي على الجزم اللي مصنوعة من جلد جودته عالية لانها
ممكن تتلف الجلد وتبوظه, وممكن تجربي الطريقة الاول على جزء صغير من الجزمة عشان
تشوفي تأثير الكحول على الخامة بتاعتها.
لو مش عايزة تستخدمي الكحول دلوقتي فيه سبراي Stretch spray بيتباع في المحلات بترشيه جوه
الجزمة بيساعد على توسيعها بس المنتجات دي بردوا مكوناتها بتحتوي على الكحول.
2- استخدام القالب:
ممكن تستخدمي القوالب الجاهزة ودي بتتباع
معاها سائل بيترش في الجزمة الاول عشان يساعد على التوسيع وطريقة استخدامها سهلة.
– اول حاجة بترشي السائل جوه
الجزمة.
– وبعدين بتحطي القالب
وبتلفي مفتاح التوسيع بتاعه.
– سيبي القالب في الجزمة
ليلة كاملة.
والطريقة دي تعتبر افضل طريقة لتوسيع منطقة
الصوابع وعرض الجزمة وده بردو بيعتمد على شكل القالب لان ليه اشكال كتير انتي
بتشتريه حسب احتياجك, والطريقة مناسبة للجزم المصنوعة من مواد طبيعية, والجلود,
والجلود المدبوغة.
3- استخدام السيشوار:
لو عايزة وسيلة سريعة وسهلة لتوسيع الجزمة
الطريقة دي هتكون مناسبة ليكي كل اللي هتحتاجيه شراب تخين, وسيشوار.
– البسي الشراب وعليه الجزمة.
– شغلي السيشوار على درجة
الحرارة العالية وركزي الحرارة على الاماكن الضيقة في الجزمة بس متقربيش الحرارة
من الجزمة زيادة عن اللزوم يعني خلي في مسافة شوية.
– واثناء ما انتي مركزة
الحرارة حركي قدمك وصوابعك جوه الجزمة.
– وبعدين اتمشي بالجزمة شوية
لحد ما تبرد من حرارة السيشوار.
– لو بعد ما خلصتي الخطوات
لسه حاسه ان الجزمة ضيقة كرريها تاني من 1 – 4 مرات كمان.
والطريقة دي مناسبة جدا لكل الجزم المصنوعة من
مواد طبيعية لانها هتساعد على توسيعها من غير ما الحرارة تضر خامة الجزمة.
.
4- حطي الجزمة في الفريزر:
الحيلة دي بسيطة جدا وفعالة لتوسيع الجزمة كل
اللي هتحتاجيه زيبلوك او كيس عادي, ومية.
– املي الكيس لحد نصه
بالمية, واستخدمي كيس لكل فرده.
– اقفلي الكيس كويس جدا عشان
المية متتسربش منه.
– وحطي كل كيس منهم في فرده
من الجزمة.
– وبعدين حطي كل فردة جوه
كيس بلاستيك تاني كبير عشان تحميها من التلج او اي مية ممكن تكون موجودة في
الفريزر.
– سيبيها ليلة كاملة في
الفريزر لحد ما المية تتجمد وتتحول لتلج هيتمدد ويساعد على توسيع الجزمة.
والطريقة دي مناسبة جدا لتوسيع منطقة الصوابع
بشكل خاص, وتنفع لكل خامات الاحذية بما فيهم حتى البلاستيك او اللميع.
5- وديها لمحل تصليح الجزم:
لو انتي بقى مكسلة تعملي اي طريقة من الطرق دي
في البيت ممكن بكل بساطة تاخدي للمحل اللي بيصلح الجزم يوسعهالك بالطريقة المناسبة
وخصوصا لو الجزمة مصنوعة من خامة جودتها عالية وغالية اوي مثلا وانتي خايفة عليها
من اي طريقة من الطرق دي يبقى اسلم حل انك توديها للمحل.
ياللا جربوا الطرق وقولوا لنا النتايج, ولو
جربتوا طريقة مختلفة عن الطرق دي ونجحت معاكم ممكن تشاركونا تجاربكم.
---------------
المصدر موقع الامة
----
لمزيد من الاستفسارات و الاسئلة عن القدم السكرى واحذية مرضى السكر واحدث جهاز لتشخيص وتحديد أماكن الضغط عند مريض السكر للوقاية من القدم السكرى والقروح رسالنا على الواتس اب 00201126629271
ولاستقبال رسائل يومية طبية مفيدة ارسل كلمة ( طبية ) لنفس الواتس اب السابق
00201126629271
تواصل معى بخصوص مشاكل القدم والقدم السكرى على الرابط التالى
--
تمنياتنا للجميع بالصحة والعافية
ملاحظة : جميع ماذكر من علاجات ربما لاتناسب مريض السكر والقدم السكرى لذلك يجب استشارة طبيب القدم اولا او تواصل معنا قبل ان تبدأ بأى علاج مما ذكر
ليست هناك تعليقات:
إرسال تعليق